Hai un ano, Pipo aterraba por primeira vez no xardín de Berta… e tamén diante do público máis esixente: a cativada. Desde entón, o pequeno marciano viviu aventuras, coñeceu novos lugares e levou as súas trasnadas moito máis alá de Galicia.
Pipo cumpre un ano!
O 27 de agosto de 2025, oitenta cativas e cativos convertíanse nos primeiros espectadores das aventuras de Pipo. Foi no Castelo Conta, poucos días antes de que o pequeno marciano chegase ás pantallas de Xabarín.gal. E desde aquela, non parou quieto!
É que cando un extraterrestre chega á Terra por primeira vez, todo pode converterse nunha aventura. Os costumes dos humanos, a comida, os animais, os obxectos cotiáns… Pipo mira o mundo con curiosidade e fai preguntas sobre todo aquilo que a nós nos parece completamente normal.
Durante este primeiro ano, esas aventuras saíron tamén da pantalla e chegaron a novos lugares. Pipo pasou polas aulas, polas bibliotecas e polos festivais, onde nenas e nenos puideron coñecer de preto as historias de Berta e do seu particular amigo azul.
O Carballo Interplay incluíu a serie na programación da súa XIII edición cunha proxección especialmente pensada para o público miúdo. A cita permitiu que novas crianzas se achegasen ao universo de Pipo e descubrisen as súas trasnadas nunha das bibliotecas de Carballo.
O extraterrestre tivo tempo para visitar as aulas. En maio participou en ‘O oficio de producir’, unhas xornadas educativas nas que o alumnado do CEIP de Agolada puido coñecer como se fai unha produción audiovisual. E así, ademais de contar as súas aventuras, Pipo tamén serviu para descubrir todo o traballo que hai detrás delas: desde a creación das historias ata a animación e a produción dunha serie.
E, como non podía ser doutra maneira, neste primeiro ano tamén chegaron algunhas sorpresas.
As aventuras de Pipo foron finalistas nos XXIV Premios Mestre Mateo, na categoría de Mellor Serie Web. Ademais, durante o encontro de finalistas, celebrado no Museo Interactivo de Historia de Lugo, a serie recibiu o Premio Deleite á promoción da lingua, un recoñecemento ao seu papel á hora de achegar o galego ás crianzas a través de historias próximas, divertidas e cheas de imaxinación.
E parece que o pequeno marciano tiña ganas de coñecer mundo, porque pouco despois as súas aventuras viaxaron aínda máis lonxe. Pipo foi seleccionado como finalista no Celtic Media Fest, un encontro internacional dedicado ás linguas e culturas das nacións celtas. Unha nova viaxe para un extraterrestre que, cando chegou á Terra, non sabía moi ben onde aterrara.
Agora, un ano despois daquela primeira proxección no Castelo Conta, Pipo xa ten ás súas costas aulas, bibliotecas, festivais, premios e novas amizades. E probablemente aínda lle quedan moitas cousas por entender dos humanos. Non credes?
A curiosidade de Pipo non ten límites. E as súas aventuras, tampouco.
🎂 Feliz primeiro aniversario, Pipo!