Fai o teu propio Pipo!

Ter a Pipo na casa ten que ser algo divertidísimo. Nunca sabes que vai facer, nin como vai reaccionar… cada día é unha sorpresa! E ti, imaxinas como sería ter o teu propio Pipo? Pois temos unha boa nova: se non o imaxinas… podes facelo!

Hoxe propoñémosche unha manualidade moi especial para estes días de vacacións: crear o teu propio marciano peludiño, suave e sorrinte, listo para acompañarte en todas as túas aventuras.

Que materiais necesitas?

• Cartón (para facer a forma do pompón)
• Lá (azul… ou da cor que ti imaxines que hai no planeta de Pipo!)
• Ollos saltóns autoadhesivos
• Cartón ou cartulina (para o sorriso e os pés)
• Tesoiras
• Pegamento ou pistola de silicona (con axuda dunha persoa adulta)

Como facemos o noso Pipo?

• Prepara a base: debuxa dúas formas redondas en cartón (coma dous donuts) e recórtaas. Esta será a base para facer o pompón.
• Envolve a lá: coloca as dúas pezas xuntas e comeza a pasar a lá arredor delas, unha e outra vez… canta máis lá uses, máis peludiño será o teu Pipo!

• Corta e dá forma: cando estea ben cheo, corta a lá polos bordes (pide axuda se fai falta). Logo, pasa un fío polo medio, átao ben forte… e xa tes o teu pompón!

• A peitear ese marciano! Recorta un pouco a lá para darlle forma redondiña. Pipo ten que quedar suave, esponxoso e listo para sorrir!
• Engade os detalles: pega os ollos saltóns e crea o seu gran sorriso cun anaco de cartulina. Se queres, tamén lle podes facer pés… ou o que ti imaxines!

E xa está! Xa tes o teu propio Pipo listo para vivir mil aventuras contigo.

Podes levalo contigo, inventar historias, poñerlle voz… ou incluso facerlle amigos doutros planetas! Porque, como xa sabes, a vida está chea de sorpresas… e con Pipo, moitas máis.