E se tes que aprenderlle todo a un marciano?

Hai días nos que todo parece ir un pouco torcido. Iso pensaba Berta unha mañá calquera, sen imaxinar que estaba a piques de vivir algo extraordinario. No patio da súa casa, entre o cotián e o inesperado, apareceu Pipo: un pequeno extraterrestre chegado doutra parte da galaxia, curioso, ruidoso e con moita fame… moitísima fame!

Desde ese momento, a vida de Berta cambia para sempre. Pipo queda a vivir na casa, aprende pouco a pouco como funcionan as cousas na Terra e observa todo cunha mestura de sorpresa e entusiasmo. Lavar os dentes, almorzar, regar as plantas ou debuxar convértense en auténticas aventuras cando se miran cos seus ollos.

Na familia, cada quen vive a chegada de Pipo ao seu xeito. Mamá intenta que todo siga unha certa orde, Mocos atopa un novo compañeiro de trasnadas e Berta descobre que ter un amigo tan diferente tamén pode ser marabilloso. Porque Pipo non só come cousas imposibles ou fai malabarismos inesperados: tamén garda segredos e habilidades que irán aparecendo pouco a pouco.

Así, conta pequenas historias do día a día vistas desde a curiosidade e a imaxinación. Capítulos curtos para os pequerrechos da casa, nos que se fala da amizade, do descubrimento do mundo e de aprender xuntos. Porque ás veces non fai falla viaxar moi lonxe para vivir unha gran aventura… chega con mirar o que nos rodea con outros ollos.

A serie ‘Pipo’, está producida por Undodez para a Televisión de Galicia, e os dez primeiros capítulos están dispoñibles en xabarin.gal, unha primeira temporada pensada para nenos de entre 5 e 8 anos, que trae consigo todo tipo de trasnadas.